Li l-magna tal-PN hi waħda tajba (f’sens politiku naturalment mhux f’sens morali) magħrufa sewwa.  Li ħafna strateġiji nħadmu kexxun hi magħrufa wkoll: il-mod li biħ Eddie sar President u Lawrence sar Prim Ministru; il-kampanja ta’ ħabi tal-verità fl-aħħar elezzjoni fejn il-poplu ingħata l-impressjoni li dak li kien ħażin ma tantx kien ħażin u dak li kien tajjeb kien tajjeb ħafna.  Il-verità kienet bil-maqlub imma la l-poplu għażel li jemmina allura m’hemmx x’tagħmel.  Għalhekk l-Ingliżi jgħidu li poplu dejjem ikollu l-gvern li jixraqlu.

Refgħu għas-sħana tas-sajf u l-aljenazzjoni li din iġġib magħha biex ħabbru l-prezzijiet l-ġodda tal-gass taċ-ċilindri; vera konna qed nistennewha u vera li politikment ikkalkolaw li sa x-xitwa inkunu drajna nħallsu, imma ħalli jerġa’ jaqbad il-bard u malajr kulħadd jistenbaħ.  X’inhuma għal Malta illum żewġ miljunu u nofs ewro ta’ sussidju?  X’inhuma żewġ miljunu w nofs ewro ħdejn it-tmenin miljun u aktar li l-gvern ser jonfoq fuq il-parlament il-ġdid u d-daħla tal-Belt (għax bieb mhux ser ikun hemm)?

U issa sirna nafu li l-pjan lokali tal-Belt ser ikollu jinbidel għax kif kulħadd għaraf, jekk tinqata’ t-triq li tgħaddi minn fuq Bieb-il Belt, it-traffiku żgur ser ikollu jinbidel.  U hawn tifhmu kif jaħdem il-ġurdien.

Min ikkritika l-gvern li tant hu inkapaċi li m’għarafx li kien ser ikollu jbiddel ir-rotot u t-triqat ta’ ġol belt hu verament fidil.  Kien jaf il-gvern x’qed jagħmel imma kien jaf ukoll li jekk ibiddel il-pjan tal-Belt bla raġuni valida kien ser joħloq inkwiet kbir.  Mela x’għamel?  Ftiehem kollox ma Piano, ma sar xejn bil-miktub qalulna, u varaw il-pjan tal-parlament.  Ħallew l-ilma joqgħod biex ikunu jistgħu jxommu kemm dan il-pjan jiġi milqugħ tajjeb jew le, imbagħad ħarġu bl-isbaħ biċċa xogħol.

Użaw isem Piano biex jagħlqulna ħalqna imbagħad qalulna “Tkun ħasra jekk pjan sabieh bħal dan – ta’ l-aqwa perit fid-dinja tafux! - jintefa għax il-kumplament tal-Belt ma taqbilx miegħu!”  U issa ser naraw dan isir.  U bis-saħħa t’hekk tajjarna l-karozzini minn misraħ il-Palazz u minjaf kemm ser ikun hemm tibdiliet oħra. U biex dan kollu jirnexxi, x-xogħol ser jingħata f’idejn managers stranġieri.

Għad fadal erba’ snin għall-elezzjoni u min jaħseb li l-ġurdientilef għaqlu, qed jiġri wisq.

Il-Majsi